ربنا عَرفُوه بالعقلِ

بقلم/ عمر أبو الحسن

كنت في قعدة انس راقية مع اصحابي من ايام الاعدادي والثانوي احتفالا بصديقنا اللي جاي من المانيا اجازة اسبوعين وراجع..
فحد مننا شكله كده ابن ناس ولا ايه قال ما تيجوا نقرا سورة من القران كل واحد يقرا منها صفحتين قبل ما نبدأ قعدتنا والكلام ياخدنا ويغوط بينا في احوال البيت والغيط والمال والعيال والقيل والقال..

ولما خلصنا القراءة حد تاني شكل اهله صارفين عليه كويس فالتعليم سألنا مين لفتت نظره أية معينة من اللي قرأناه حالا..
وفعلا كل واحد قال خاطرة جميلة عن أية حكيمة تدل انه كان مركز في القراءة والاستماع ما شاء الله….اما انا بقى بعيد عنكم كنت مبلول..مش لاقي حاجة اقولها…لحد ما ربنا الهمني الخاطرة دي..فقلت لهم كلمتين في المنطق..
قلت لهم بصوا يا شباب..في حاجة اسمها الايمان المنطقي.. وده معناه اني اسند على كل الايات الواضحة ليا زي الشمس واسند على فطرتي وسلامة تفكيري في تكوين ايمان شامل قادر انه يحتوي اي أية او اي امر الهي مش مفهوم ليا في الوقت الحالي..

وان اي حد سالم المنطق سليم التفكير نقي الفطرة هو اللي بيبحث ويدرس ويناقش ويجادل في الامور الواضحة جدا له في موضوع معين علشان بعد ما يسلم بيها عن اقتناع تام ..يقدر بعد كده يسند عليها ويوصل لاستنتاجات او (ايمان) بباقي الاجزاء غير الواضحة له في الموضوع ده..
زي بالظبط اللي اتعلمناه في رياضيات الاعدادي والثانوي لما درسنا (ازاي نستنتج مجهول باستخدام معلوم….اللي هي معادلات ال(س,ص,ع,…) فاكرينها؟؟ )…
ده بالظبط اللي بيعمله الشخص المؤمن لما بيؤمن باليوم الاخر وبالملائكة وبالجنة وبالنار رغم انها مجاهيل بالنسبة له لسه مشفهاش بعينه..

لكنه ايقن وامن بيها لما سند علي المعلوم والمحسوس بالنسبة له واللي هي ماليه الكون من حواليه من دقة ابداع الله في الخلق ومن جودة النظام الاخلاقي اللي وضعه ربنا للبشر عشان يحميهم من بعض..وكمان استنتج ايمانه لما شاف قدر الفساد والضرر والظلم والدمار اللي حصل فالدنيا لما لغى الانسان تفكيره المستقيم وتخلى عن فطرته السليمة واختار انه يبعد عن خالقه ويدير الارض بنفسه دون ان رجوع لكاتالوج الخالق..هنا ظهر الفساد فالبر و البحر والجو بل امتد الفساد ليشمل الفضاء المحيط بنفايات الاقمار الصناعية مثلا  واصبحوا في النهاية المنطقية لهذا البعد عن الخالق في غابة متوحشة ياكل القوي منهم الضعيف..

اعرفوا وعلموا عيالكم ان الكون ده ليه صاحب..وان الابداع ده ليه مُبدع..وان الارزاق اللي متوزعة ليها مُقسم..وان اشرف وظيفة للانسان انه يبحث عن خالقه ويعرفه ويتمسك بأوامره عشان يرتقي فالدنيا قبل الآخرة..
وصِدقاً قالوا: “ربنا عَرفوه بالعقل.”