«كمامتين وبس»

اليومين دول العالم مورهوش حاجة غير -قصة كورونا-.. وعداد الإصابات والوفيات اللي شغال كل لحظة بجد يخوف.. لكن المصريين كالعادة ماشيين بمبدأ الطبع بيغلب التطبع.. وكورونا مين يا عم.. النزول للشارع أهم..

طوفان كورونا اللي بيجتاح تقريبًا كل قارات العالم.. مش طالب مننا غير الالتزام بالإجراءات الصحية علشان قالوا زمان: الوقاية خير من العلاج.

كل اللي طالبه الفيروس شوية إجراءات يومية بسيطة زي النظافة الشخصية.. ومتلمسش أي سطح أو أشخاص بعد السعال أو العطس.. وكمان تحافظ على مسافة متر أو مترين بينك وبين أي حد.. وتستعمل المناديل الورقية أو كوعك لما (اتششووو) تعطس يعني.

لو بتغسل ايدك بالمية والصابون لمدة 20 ثانية.. متقولش 18 وتعذب الفيروس.. هو اللي هيعذبك.. ومتلمسش عنيك ولا مناخيرك بايدك لو مش مغسولة يبقى كتر خيرك وبلاش خلط كلور بكحول كده هتيجي تكحلها هتعميها.. وكمان بلاش بوس وأحضان نوهائي بصوت «حلاوة العنتبلي».. وخلي عندك كمامتين وبس في اليوم.. واحدة وانت رايح شغلك وواحدة وانت راجع للبيت.

يعني بالعربي: «Stay home»
وبالإنجليزي: «خليك في البيت»
والعب بنك الحظر مع عيالك
مش كده ولا إيه؟؟ بصوت #فؤاد_المهندس