«سي السيد بيكلم سما المصري على الواتس»

في أول تسريب لمحادثة السيد أحمد عبدالجواد الشهير بـ«سي السيد» و«سما المصري» و«الست أمينة» على الواتس آب، دار حديث لم يتوقعه أحد في رمضان 2020.

سي السيد: هاي.. ممكن نتعرف؟
سما: ميحكمشي يا دلعدي.
سي السيد: ليه كده يبنتي ده احنا لسه ع البر.
سما: ع البر ولا البحر.. هو أنا اعرفك؟
سي السيد: مش انتي اللي فاتحة اونلاين.
سما: أهو بنتونس ببعضينا.. ده احنا في أيام مفترجة.
الست أمينة: جرى إيه يا سى السيد.. تليفونك منور ليه تحت البطانية.
سي السيد: اتخمدي يا ولية.. ده قلب المؤمن.
سما: ده شنبك ولا دي صورة سناب شات.
سي السيد: ههه ههه لأ ده شنبي اللي يقف عليه الصقر مش فوتوشوب.
الست أمينة: جرى إيه يا راجل هي المخدة بتزغزك ولا إيه؟
سي السيد: اتخمدي بقى يا ولية لانكد عليكِ.. قومي حضري السحور وجب.
سما: وانت منين يا معلم بالطربوش ده.
سي السيد: من زقاق المدق عند المشربية كده ناحية السكرية.
سما: أبعد ناس.. بس البعيد يقربلك.. انت استثنائي مش زي الباقي يا معلم.
سي السيد: اشرب أزوزة واكل بلوظة يا قمر.
أمينة: جرى إيه يا راجل.. بلوظة إيه اللي هتاكلها.. ما تنزل تشترلنا زبادو ولا باور هورس.
سي السيد: دي ممكن اطلقك فيها يا ولية.. أنا متسحرش غير من عند التابعي الدمياطي أو آخر ساعة.
أمينة: ما هو فول العربية اللي على أول الشارع مبقاش أد المقام.. من ساعة الحظر.
سي السيد: ما تيجي تتسحري معانا يا ست سما.. ده احنا نفرشلك الحظر ورد.
سما: خليها يوم تاني يا سي أحمد.. عندي طلعتين فيديو للفولورز على الاستوري بتاعتي قبل الفجر.
سي السيد: اللهم قوي إيمانك.. روحي إلهي يسترك يا شيخة.
أمينة: وديني عند أمي يا سي السيد.. اتسحر معاها.. جايبة عرض من عند أولاد رجب 12 زبادي عليهم 2 فواكه تحفة تحفة.
سما: هعمله بلوك يا اختي واشبعي به.. أنا مش فضيالكم.. لما أشوف ست «ميس قطونيل» دي آخرها إيه.. و«حنين وكالة».
سي السيد: أموت أنا وأعيد السنة.
رضوى الشربيني: بلوق بلوق بلوق.