بقلم احمد الباز يكتب: اعرف اقتصاد بلدك

مصر اشترت مؤخرا 44 طن دهب و بالتالي رفعت الإحتياطي المصري وشكلت في الاقتصاد المصري بسلة من العملات ودي خطوة ممتازة ومتأخرة في نفس الوقت وكان يجب انها تكون من زمان ولكن أن تبدأ متأخرا خير من أن لا تبدأ زي المثل الأمريكي مابيقول لأن الدهب عالميا هينخفض سعره الفترة القادمة إذا ارتفعت الفايدة في الفيدرالي الأمريكي وطالما اتأخرنا في شراء الدهب فكان ممكن ننتظر شوية لكن في كل الأحوال مصر اشترت في فبراير ومارس 2022 يعني قبل ما الحرب الروسية تشتد وقبل ما الدهب يزيد بشكل كبير، خطوة شراء مصر للدهب بتأكد وعي الدولة باللي جاي وهو التخلي عن الدولار كملاذ آمن والتحول تجاه الدهب ودا شيء إيجابي بس الأكثر ايجابية هو التحول بالدولة نحو الإنتاج production والتشغيل لأن دا هو الملاذ الآمن الحقيقي غير كده شكليات مؤقتة.

– مصر ممكن تفلس ؟!

إن شاء الله مش هتفلس بالعلم والإقتصاد والسياسة والجغرافيا مش هتفلس بس الشعب لازم يغير سلوكياته عشان يعرف يتواكب مع الأوضاع الحالية والمستقبلية السيئة، طب ولو انت مصمم انها هتفلس انا مقدرش اساعدك كل اللي هقولهولك طالما انت شايف انها هتفلس فالباسبور المصري الأخضر ده بيسمحلك بالسفر لحوالي 50 دولة من غير فيزا، خد ياباشا استثماراتك وفلوسك واهرب علي اي دولة من ال50 وربنا يكون معاك ويوفقك

واجمالا نقدر نقول والله أعلم واهل العلم يقدروا يصححوا لي هذا .. ان الجنيه هينخفض في مقابل الدولار
ونقدر نقول ان الدهب هينزل عالميا مع رفع الفيدراللي الأمريكي للفايدة بس مش هينزل سعره في مصر لأن السوق المصري منفلت في الأسعار

ونقدر نقول ان الأسعار في مصر لسه هتزيد وبالتالي لابد من الترشيد في الاستهلاك
ونقدر نقول اشتري قسط لان قيمة العملة المحلية هتنخفض وبلاش كاش مهما كانت المغريات بس طبعا اعمل موازنة ما بين دخلك ومصاريفك عشان تعرف تشتري قسط وانت مطمن
ونقدر نقول بلاش قروض دلوقتي عشان الفايدة عالية

ونقدر نقول حاولوا تعملوا تكتلات من رؤوس الأموال واعملوا شراكات ويد الله مع الجماعة وانتجوا ولو حتي أساتك الفلوس ودبابيس الطرح وهكذا عشان اللي جاي هو انتعاش للإنتاج المحلي فلو المحلي مش موجود هتبقي الأمور صعب لأن الدولة هتضطر للإستيراد ودا أمر مهلك لأي اقتصاد مهما كان قوي.

تحياتي وكل عام وانتم بخير وعيد سعيد علي الجميع.