“من أمن العقوبة أساء الأدب” الزمالك “أستنوني..أنا موش جاي”

سامحوني  ..لأول مرة هكتب باللغة العامية الفصحى .. بمنتهى التجرد والحيادية أكتب الآن عن الكارثة الكروية اللي حصلت بالأمس في استاد القاهرة..استاد القاهرة اللي انكتب عليه يكون شاهد على أحداث تاريخية ونجاحات خلدها التاريخ المصري الحديث وفي نفس الوقت للأسف انكتب عليه برضوا يشهد مهزلة كروية جديدة بطلها أحد اكبر النوادي الشعبية والاكثر جماهيرية ليس في مصر فقط ولكن في الشرق الوسط ايضا..مباراة القمة اللي بتجمع ما بين من يطلق عليهم قطبي الكرة المصرية والعربية والإفريقية ..

الجو ملبد بالغيوم والناس اللي بتحب الكورة رجعت من اشغالها في انتظار ضربة بداية لمباراة المفترض انها محددة الموعد مسبقا والكل عارف ميعادها بالدقيقة لانها مباراة غير عادية.. واذ بنا نفاجئ بسلسلة من الاحداث العجيبة والغريبة بداية من اليوم السابق للمباراة وحتى كتابة هذه السطور ، مسئول النادي الهمام وصاحب الرأي الأوحد كعادته عمال يعيث في الارض فسادا منتهجا بصوته النشاز العالي وتصريحاته الفجة المنفلتة اللي بيطلقها يمين وشمال بانه هيعتذر عن لعب المباراة ، مش كدا وبس لأ وكمان موش هيكمل الدوري من اصله احتجاجا على قرارات اللجنة المؤقتة اللي بتدير اتحاد الكرة “اللجنة المؤقتة” اللي رئيسها أصلا أحد اكبر المنتمين لناديه ووزير شباب دولته أحد اكبر اعضاء نفس النادي.. وطبعا كالعادة الناس توقعت انها “طق حنك” وفرقعة معتادة من الريس حنفي شيخ الصايدين وانه هيرجع في كلمته وهتنزل المرة دي زي كل مرة وهيلعب المباراة وهيكمل الدوري عادي يعني ..

وجت الساعة 6:30 والأتوبيس بتاع لاعيبته لسه ماجاش ولا في حد منهم وصل وقالولك انه هيبعت تشكيلة من فريق الشباب والناشئين هيلعبوا بدلا من الفريق الاول وموش فارقة معاه بقى انه هيحرقهم ويخلص عليهم وهما في بداية الطريق “والله ما بيحصلشي كدا ولا نص كدا حتى في بلاد الواق واق” اللي انا اساسا ماعرفشي هي فين دي.

عموما انتظرنا لحد الساعة 7:30 والاتوبيس ماجاش بردوا.. بيقولوا عطلان على كوبري اكتوبر وهما طالعين من النادي الساعة 4:00 العصر ، قسما بالله دول لو كانوا نزلوا وركبوا موتسيكلات او أجروا عجل اوحتى خدوها على رجليهم كانوا لحقوا يوصلوا استاد القاهرة.

طبعا عارفين انه في حكمة بتقول “اذا فسدت الرأس فسد باقي الجسد” ، “فالسمكة تفسد من راسها” اعتقد انه مش معقول دولة بحجم مصر يكون دا هو طريقة ادارة الأمور الرياضية فيها.. مستحيل تنصلح أحوال الرياضة المصرية الا اما نتخلص من المعتوهين اللي بيديروا الرياضة في مصر.. هما ازاي موش بيكشفوا على القوى العقلية للمسئولين كل فترة .. مش يمكن يكون كان عاقل زمان وبعدين فكت منه حاليا ، واضح للعيان ان الراجل دا موش طبيعي ومن زمان ، ولا احنا فرحانين بوجوده كدا وسايبينه أهو عامل جو.

اخونا الحكم الليتواني قال في تصريح لمراسل القناة المصرية انه عمره ما شاف كدا في اي حته في العالم .. بس احنا موش اي حته يا باشمهندس..نحن نختلف عن الاخرون .. دول اكبر ناديين في مصر والشرق الاوسط والفريق اللي ماجاش دا بطل السوبرين المصري والافريقي من عشر ايام بس.

والله احنا ظالمين كورة القدم دي معنا  ، ما هي كورة القدم لو بتعرف تتكلم كانت سبت ولعنت وقذفت ويمكن انتحرت عشان ماتتلعبشي في بلدنا تاني..احنا بنلعب حاجة واللي بنشوفه برا دي حاجة تانية خالص.. احنا بنهرج وبنتدلع وبنسيب الحبل على الغارب للمفسدين والعبثيين يترنحوا بمقدرات الشعب ويزودا الشارع احتقان بلا اي مبرر .. دا احنا ماكملناش 5 ايام على فضيحتنا اللي كانت عيانا بيانا في الامارات ، قوم تيجي سيادتك تكمل عليها هنا.. يا اخي اتق الله فينا الناس موش ناقصة.. كمان بيقولك ان انا انقذت مصر من كارثة كروية ومن فتنة كانت هتولع الدنيا.. ومافيش حد هيقدر  يخصم منه نقطة واحدة لأن “كل شئ مدروس” على رأي عادل إمام في لصوص لكن ظرفاء. علاوة على ذلك مدير الاعلام بالنادي بيصرح “وقفنا في الطريق عشان نجيب عصير وشيبسي للولاد احسن ماتغدوش”

موش قولت لكم”من أمن العقوبة اساء الادب” مافيش رادع وماحدش بيوقف حد فخليه طايح واللي يلاقي دلع ومايدلعشي.. انتوا عارفين

فمش معقول القيادة السياسية تكون شايفة هذا الشخص الأهوج عمال يفضحنا في كل مكان وهي واقفة تتفرج عليه بدون اي تدخل..اكيد في حاجة احنا موش فاهمنها هوا “مستر اكس مالووش نهاية”

اؤكد للجميع انا لست مع ولا ضد فانا كما اكدت في بداية الكلام فوق اكتب بتجرد وحيادية تامة ولا يهمني من يفوز بالمباراة ولا حتى من يفوز بالدوري ، فزيادة عدد بطولات الاهلي في الدوري لن تضيف لي انا شخصيا شئ كما ان فوز الزمالك لن يخصم مني ولا من الأهلاوية شئ ولكني متأكد ان غالب الاخوة الزملكاوية موش عاجبهم تصرفات من يقود ناديهم كما انهم لم يتخيلوا ان تصل به اللامسئولية الي هذا الحد من الانفلات.

نفسنا نصحي نلاقي الكابوس دا انزاح من على قلوبنا.. تعبنا فعلا.. بجد شكلنا بقى وحش قوي..كفاية فضايح بقي