المستشار إسلام محمد سيد أحمد يكتب: ابليس له صوت ! 

” وَاسْتَفْزِزْ مَنِ اسْتَطَعْتَ مِنْهُم بِصَوْتِكَ ”

كنت بشرح النهاردة للبنات الوساوس و اشكالها، و كانت دي نقطة مهمة جدُا حبيت انبه ليها :

تلاقي نفسك فجأة حصلك ألم مفاجئ في منطقة في جسمك ..
تدخل على جوجل تلاقي إن دي من ضمن أعراض مرض خطير ..

تقرأ الأعراض تلاقي نفسك بدأت تحسها بجد مش تمثيل !

تلاقي ضربات قلبك بتزيد .. زي ما الأعراض بتقول ..
تلاقي نفسك دايخ .. زي ما الأعراض بتقول ..
تلاقي نفسك حاسس بألم مُعين .. زي ما الأعراض بتقول ..
و تكشف .. تلاقي مفيش آي حاجة !

اللي حصل ده اسمه ” صوت ابليس “من ضمن معاني الاستفزاز بالصوت، صوت يزعجك، يؤلم بدنك، يتعبك، يدخلك في مخاوف و أوهام ملهاش أي أساس من الصحة !

صوت يهجم عليك يخليك .. تشك في حد .
صوت يهجم عليك يخليك .. تسئ الظن فجأة .
صوت يهجم عليك عليك يفكرك .. بـ أذى حد اذاك بيه .
صوت يهجم عليك يفكرك .. بـ حُزن قديم .

استفزاز بصوته، تحِس إن الصوت في ودنك، و بيتعبك ، المطلوب منك في الوضع ده حاجتين :

1- تعرف إن ابليس له صوت، أي صوت سلبي جواك بيحزنك و يؤلمك.

2- لمّا يبدأ الوسواس في نفسك بكل هدوء استعيذ بالله من الشيطان و حوّل اللحظة دي للحظة عبادة، ازاي ؟

ادعي !

يعني وسواس مرض : يارب عافيني و سلمني و اصرف عني كل شر

وسواس حد هيموت : يارب بارك في عمره و لو قبضته احسن خاتمته و رضيني بقضائك

وسواس شك في حد : يارب لو في حاجة نورني أنت تعلم سر اللي قدامي و ثقتي فيك إنك مش هتضيعني و هتُريني بنورك ما خفي علي و هتحميني

كده مع الوقت بإذن الله الشيطان هيهجرك في الوساوس، لإنه لمّا جيه يوسوسلك كان عايز يحزنك و يزعلك، فـ أنت حولت اللحظة للحظة عبادة و مناجاة مع ربنا و ده ضد اللي هو عايزه تمامًا .

لحظة الوسوسة دي بتعمي، و ممكن تدخلك في دوامة متطلعش منها و تفقد بسببها عقلك، استعيذ بالله و الجأ له :

” إِنَّ الَّذِينَ اتَّقَوْا إِذَا مَسَّهُمْ طَائِفٌ مِنَ الشَّيْطَانِ تَذَكَّرُوا فَإِذَا هُمْ مُبْصِرُونَ”