د. وسام فاروق تكتب: 4 علامات لو لقيتهم في حياتك.. اعرف إن عندك مشكلة لازم تدور لها على حل

العلامة الاولى ..

انك دايما بتحب ترضى كل اللى حواليك حتى لو على حساب نفسك..

بتحسس نفسك ان الحكاية مش صعبة وانك قادر تساعدهم وحابب كده..!!

و ده طبعا مش طبيعى ده سبب تربيتك على الحب المشروط

تلاقى الام كانت تقولك هاحبك لو نجحت

لو خلصت طبقك ….!!!

العلامة التانية..

دايما حابب تقول انك فلان وانك فظيع فى اى حاجة ..

نفسك الكل يمجد فيك وفى اى حاجة بتعملها

و ده سببه انك كنت مش متشاف فى اسرتك..

مش بيشجعوك ولاعمرهم كانوا الداعم ليك .دايما مقللين منك ومش فرحانين بنجاحك…

العلامة التالتة..

انك عايز تشترى كل حاجة غالية او تشترى بكميات ..

و ده سببه الحرمان فى اسرتك

والحرمان مش لازم يبقى فقر او ان ماعندكش حاجات ..لا ..

ممكن يبقى الحرمان فى الحاجة اللى اتمنتها او طلبتها ..وده كمان مرتبط بالتقليل منك ومن احتياجاتك…

العلامة الرابعة …

التودد الزائد لمامتك وباباك واخواتك ..ودايما عايز تقول او تثبت انك بتحبهم جدا باى طريقة ..

ده دليل انهم مش فى قلبك ولا واخدين ربع المكانة ..لكن خوفك الزائد انك تقصر تجاههم نتيجة تقصيرهم معاك زمان ودلوقتى ،

الخوف من الذنب يخليك تعمل تصرفات لا يستحقوها..

وساعتها تقصيرك هيبقى مع نفسك ومع ناس تانية حواليك بيحبوك بجد..

كل دى علامات بتقول انك اتربيت غلط …

اتربيت على ايد ام قاسية او مهملة

ام ماعرفتش تحبك صح

حسستك بالحرمان وخلتك مش متشاف فى عينها

وغالبا قارنتك باللى حواليك..

المشكلة الحقيقة..

ان استمرارك فى نفس التصرفات هيؤذى نفسيتك بدون ماتحس وغالبا كل اللى خايف منه وبتداريه بردوا هتحسه اضعاف اضعاف وعمرك ماهتحس انك كويس

وتبدا طبعا تُسقط اى احساس سئ بتحسه على اللى حواليك كأنهم هم السبب ، هم اللى مقصرين، هم الاشرار .. وبالتالى هتخسرهم مع الوقت وترجع وحيد تانى ومش متقدر ولا متشاف وهتفضل فى الدايرة دى..

لكن لو عايز تعيش مرتاح تحس صح تجاه كل حاجة

يبقى اولا..

لازم تراقب نفسك هل انا عندى علامة من دول؟

ثانيا ..

اقتنع ان عندك مشكلة وابحث عن العلاج مع متخصص

ثالثا..

اقتنع ان مامتك كانت الأم المؤذية المخطأة فى حقك حتى لو بدون ماتقصد

وده مش معناه انك تكرهها او هتقصر معاها… لكن انت محتاج تعرف تتعامل معاها ازاى صح..بدون مايأثر على حياتك ولا تيجى على نفسك..

اعرف ان تصرفاتك دايما نابعة من تربية ..ومفهوم أم …زرعته جواك …

ولكن لازم تتقبل فكرة ان الام والاب بنى أدمين ممكن يخطأوا عادى بس الاهم ان يكون عندك الوعى الكافى لما تكبر وتواجه نفسك صح علشان ماتكونش النسخة الأسوأ منهم.