«بعد العيد إن شاء الله»

على غير العادة قرر الاسطى منصور عتمان المغازي فتح مخزن الخشب منذ الصباح الباكر، تماشيًا مع «يوميات الحظر» و«كورونا رمضان»، وعَلِم الاسطى حسن أرابيسك بذلك، قرر هو الآخر تشغيل الورشة على حس طلبية «مغلق المغازية».
أرابيسك: إيه اللي مصحيك بدري.. «الولا شقشق» جه صحاني من النجمة.
منصور: أخويا سيد يا عم حسن قرفني طول الليل بشخيره.
أرابيسك: متفكرنيش امبارح نسيت أكل الزبادي في السحور وصدري حامي عليّ.
منصور: الواحد لو يعرف عدوه ويواجهه زى ما أنا أتصديت زمان لـ«فودة أبو حطب» لما كان بيهدد الناس ببلطجته.. دلوقت العدو بقى خفي والحرب صعبة أوي.. «كورونا»، «تيك توك»، و«حظر» غير «يوسف الشريف» بتاع «النهاية».
أرابيسك: عندك حق بعد أيام «الولا سامبو» شفت بلاوي في الشارع.. وأنا اللي كنت فاكره أكتر شخص مُجرِم قابلته في حياتي.. عليه العوض.. المُهِم «الوعي» ميضعش.
منصور: هههه انت متابع بقى «عمرو عبدالجليل» في دراما رمضان 2020.
أرابيسك: الأساس وتوابع الزلزال بتوع 92 لسه سايبين فينا أثر.. ومكركبين حياتنا آه رممنا البيوت والمباني بس مرممناش نفسنا من جوه.. ومبدأناش على مية بيضا.. و«2020» دخلت بزعابيبها.
منصور: وأهو سيد أخويا جه.. قوله يا سيد قوله «شوق» مراتك وعيالك عاملين فيك إيه في الحظر؟؟.. قوله يا سيد.
سيد المغازي: بالراحة يا منصور ودني اتخرمت سمعتك.. أزيك يا عم أرابيسك.
أرابيسك: منور يا فنان.. هات شاي للفنان بتاعنا ياض يا شقشق.
شقششق: احنا صايمين يا معلم.
أرابيسك: طب بس لـ«عتوقة» يسمعنا ولا «رمضان الخُضري» ولا «أبو أنوار» مش هنخلص.
سيد المغازي: العيال والست «شوق» مبيبطلوش طلبات والغلاء واكل كل حاجة.. والنشارة بتاعت الورشة مبتأكلش عيش اليومين دول يا أرابيسك.. ده غير كل شوية جدد «باقة we» لما زهقت.
منصور: بس يا سيد.. بس يا سيد.. قولهم على «ليالي الحظر» في البيت.
سيد: يا عم حرام عليك بتزعق ليه ارحمنا بقى.. مش قايل.
أرابيسك: هههه البيوت كلها على ده الحال يا مغازي.. الحمد لله طالما عايشين ومعانا الستر والصحة.. ربنا يسترها على أهالينا من «الكارونا».
توحيدة: أزيك يا حسن انت سايبني أنا وعيالك في البيت.. وانت قاعد في الورشة بتضحك مع ولاد المغازي.. ونسيت الكمامة والكحول كالعادة.
أرابيسك: يوووو يا توحيدة هنعيدوا تاني.. احنا بنراهن على «وعي المواطنين» وزباين الورشة.
توحة: ماشي يا حسن.. استهتر بكلامي.. ده حتى «الست المسؤولة» بتغسل ايديها أونلاين 18 ثانية وبتسيب الحنفية مفتوحة 77 ثانية.
سيد: الواحد بقى تايه في الدنيا دي يا أرابيسك والمشاكل كل يوم بتكبر.. ده القبض بيخلص على «الكمامات والكلور».
عمارة: يالا يا حسن عندنا شغل في الورشة.. أومال احنا صاحيين من بدري ليه؟
أرابيسك: يوووه يا عمارة.. «بعد العيد إن شاء الله».