طارق سليم يكتب: نقطة ومن أول السطر
يارب ياللي رزقت الدود في الحجر
باعد بينا وبين شوية الغجر
اللي حكموا واتحكموا في أرزاق العباد
اللي دمهم بيجري فيه الفساد
واللي تملي ييجوا من غير ميعاد
اللي مفروضين علينا في كل الحكومات
وشاطرين تمام في صنع الازمات
واللي يزعلنا يفرحهم
واللي يفرحنا يزعلهم
كأنهم متسلطين علي العباد
ولأجل الحرية والعدالة المزيفة
راح هدر دم البنات والولاد
عيالنا ماتوا لأجل مايعلي هرم الفساد
انا بس صعبان عليه دم الولاد
اللي حبر اساميهم مانشفش من شهادات الميلاد
والتخدير شغال بكلام مالوش لازمة
وفر كلامك طالما ماحلش أزمة
انتوا جايين تضحكوا علي مين
علي شعب اكلت وشربت علي ضهره السنين..!!
خلاص الطريق ضاق ومبقاش يساعي اتنين
يااما احنا يااما احنا
ومستحيل يتصالح الطرفين
مدينا حبال الصبر عشمانين في بكرة
اتارينا اصلا مش في الفكرة
كأن الناس مخلوقة عشان تشربوها المر
وتخنقوا رزقهم ومن خرم ابرة يمر
واللهي العظيم الأوضاع ماعادت تنفع
وتعالي صلي ع اللي فيك يشفع
خليتوها سبهللة ونفعني واستنفع
البحر فيه السمك بس الصيد ممنوع
ومراكب الرزق قطعتوا منها القلوع
والحسبة متقسمة وانتهي الموضوع
كأنه مكتوب نموت عشان غيرنا يعيش
ولأجل الكروش ماتسمن نغمس بالهوا العيش
وتقولي ضحي ومالكش دعوة بيه
وكل عيش وملح لأجل عجلة التنمية
طب مين ح يعالجني من سوء التغذية
ياعم صلي ع النبي وقول كلام ينفع
وبلاش سياسة موت لأجل مااستنفع
الكيل خلاص زاد عن الحد وطفح
والحلم علي عتبة الدار اندبح
وكدابين الذفة بيرقصوا بالطبل والمزمار
وكنت فاكر نبح الكلاب بس حوالين الدار
اتاري النبح الوان وله تمن بست اصفار
والمخبر ينبح ح تاكلوا الماظ وياقوت
والناس نايمة بطنها خالية من القوت
ولسه عند الناس شوية صبر وبتعافر
بس برضه كل شيء وله آخر
دم الولاد راح هدر لأجل العدالة الإجتماعية
والنتيجة..اهاليهم محتارين في تمن التقلية
والميزان اتعوج والكفة مالت
وخيبة الأمل زادت وطالت
والفساد له ألف طريق ومسالك مسالك
والف ناب واللي يحاربه هالك
وعيالنا ماسكين الشهادات وع الرصيف قاعدين
روح روح ياشاطر مافيش تعيين
والدمعة في السما وبالدعا مرفوعة الكفين
وحنفية الوظايف متسرسبة بس للواصلين
والسيرك شغال وعلي كل لون
ناس متخمة وناس مخطوفة اللون
وتجار سموا نفسهم رجال أعمال
وفرح كبير اتنصب وقالوا اتجوزت السياسة بالمال
وخلفوا لينا خيبة امل راكبة جمال
وبالغصب اتكتب علينا نموت عشان غيرنا يعيش
وكل يوم يتنتف منا ريش
وفي النهاية لاحمد لاجميلة
والبخت مايل وحاضن قلة الحيلة
ياالف خسارة..الناس عمرها ضاع علي مافيش
( خلص الكلام )
