محمد الجداوي يكتب: «عربي شخصية ولمعي حِنجِل وعفارم عليه»

التقى «عربي شخصية» مع «لمعي حِنجِل» على قهوة «المعلم حنكورة».. ولكنهما فوجئا بتواجد عم «عفارم عليه» بجوارهما..
«عربي شخصية»: متجمعين عند النبي إن شاء الله.
«لمعي حنجل»: عليه أفضل الصلاة والسلام.. جرى اِيه يا عم عربي.. اِحنا مش كان معادنا الساعة 7؟
«عربي شخصية»: معلش كنت بتخانق مع مراتي خناقة ع السريع كده وعطلتني.
«عفارم عليه»: ليه يا شخصية يا أخويا حد عاقل يتخانق مع واحدة ست!
«عربي شخصية»: حُكم القوي بقى يا عفارم أفندي.
«عفارم عليه»: اِخص.

«لمعي حنجل»: طب اِيه سبب الخناقة؟
«عربي شخصية»: الريموت.
«لمعي حنجل»: أكيد يبقى الحِجَارة خِلصِت واِنتَ رفضت تنزل تغيرها.
«عربي شخصية»: يا عم لأ.. استنى هحكيلكم.
«عفارم عليه»: يبقى علشان معقمتش الزراير.
«عربي شخصية»: الحكمة بتقول: «لا تسأل المرأة عن عمرها، ولا الرجل عن راتبه، ولا الطالب عن مذاكرته، ولا الموجودين بالمنزل عن مكان الريموت».

«لمعي حنجل»: نظرية برضه.. طب فين المشكلة؟
«عربي شخصية»: وهي بتقلب علشان تشوف ملخص المسلسل في 3 أيام.. لقت إعلان عن -التخسيس-.
«عفارم عليه»: وبعدين؟
«عربي شخصية»: عاوزة تشتري كل منتجات التخسيس من إعلانات قنوات بير السلم.. قُمت كاسر الريموت من كُتر الزن.
«لمعي حنجل»: قلبك قاعد.. وهي كان اِيه رد فعلها؟
«عربي شخصية»: ما هي المشكلة دلوقت أنا هبات فين؟

«عفارم عليه»: خلاص أنا هديلك -شريطين تخسيس- من عند مراتي تروّح بيهم للمدام علشان متبتش برة بيتك.. بس المشاريب على حسابك.
«عربي شخصية»: عفارم عليك.
«لمعي حنجل»: فعلاً.. عفارم عليه.