قولت للسمره..

قولت للسمره
يكفيني منِك نظره
وحياة غلاوة ستنا فاطمه
وحياة مقام السيده الطاهره
خلي السما تساعني
وملايكتك تسمعني
غيبتي وقولتي
قلبي راضي عليك
ربي راضي عليك
طب ليه من يوميها
روحي مخاصماني
والحياه مُره
يكفيني منِك نظره
ومن إيدك
صينية كنافه
فى العشره الأواخر
من الشهر الكريم
وفطاري على تمره
وقلبي كان جمره
وبقيتي متجمد
صليت على سيدنا محمد
ونطقت وياكي الشهاده
وكان نسيم الفجر كالعاده
حلاوته بزياده
هوَّ انتي مخاصماني
عشان بّبات بره
وطلعت م الجره
ولا انتي لسه
هاتطبخي التورللي
وتشهقي شهقة الملوخيه
سبحان ماصبرني
على فراق خلي
بتندهيني؟
أؤمري ياعنيىَّ
أنا تحت قدمك حُر
ياحُره
هوَّ انتي فى الجنه
ولا هنا بينا
بتطيبي لي الجرح
وتسكري لي الملح
وتندهي الغايب
يتلموا كل الحبايب
وانا اللي أتفرق
إوعي تسيبيني
أغرق
لو تحت قدمِك مكان
فى جنة العدنان
خُديني بالّمره
يكفيني منِك
نظره ..