خذ مني صر

لبس الفرادي يا ولدي
هيعقب بيك
البسلك حاجة اتدفيك
استني يا واد متصربع لية ؟
ما طايقش البيت ؟!
طب غير ريقك
خدلك قطمة كحريت
من وين النفس يا اماه
علي ريق النوم
اعملك عجة بتوم؟
ولا دي صح تقيلة تخلك
طيب اقولك
في ثواني قوام
هعملك قرص امطبق
ميلك هفه يا ولدي و مدد
و القرص قوام اهو جالك اهو
و فوقيه السكر مطحون
صحناه ف الهون بيدي عشانك
علشان ميجزش ف اسنانك
مانا حافظة كلامك عرفاه
و القرص يا ولدي انا عجناه
بدقيق متمنع
عرفاك طول عمرك متقنوع
متلدش حاجة عليك
هدبحلك ديك
لما اتعاود من مدرستك
متقولي يا واد وين كراستك
عامل افندي ؟
و بقيت طولي !
ما لددش عليك يا واد قولي ؟!
و تعالي يا ولد اهنه
صليت ؟
حميتلك مية اتوضيت ؟
اضحكت عليا يا واد و غسلت اعنيك
طب لما اتعاود
شوفلك ام اتعشيك
مش دابحه الديك
و ربايتي خسارة يا واد فيك
يا اما انا صليت
ما بينش عليك
كان وشك نور و اتدور
بدعيلك ربنا يهديك
و يحبب كل الناس فيك
يديك يا ولدي و يرضيك
خد مني وصر
و انا ماشي بجر نص الجزمة فرجلي
مستعجل بجري
و اعنيها تبعاني غمراني دعوات
اطلع م العتبة اقول سلامات
و اسمعها تقول خد مني وصر
و انا طاير حر
و كاني خلاص خدت افراج
مش برضو ده مر ودلع اولاد
اكمنها ام و اكمني الواد
دانا لو شداد منساش حجرك
و اتمني اوطي ابوس رجلك
بس القيكي
و حشاني صرة دعويكي
حكاويكي
وحشاني ايديكي و اعنيكي
بتقولي يا واد
خد مني وصر