المستشار محمد سيد أحمد يكتب: ماذا تفعل لو اتقبض عليك بدون إذن نيابة ؟

اعرف كيف تثبت بطلان القبض وتأخذ حقك ؟

أولاً : متى القبض يكون قانونى ؟
القبض بيكون صحيح فى حالتين فقط :-
١- وجود إذن صادر من النيابة
٢- حالة تلبس بالجريمة
يعنى الجريمة حصلت قدام رجل الشرطة أو بعدها مباشرة
خلاف ذلك يعتبر القبض غير قانونى

ثانياً : طرق إثبات إن القبض تم بدون إذن نيابة :-

١- التوقيت فى محضر الضبط
راجع ساعة وتاريخ القبض وساعة تحرير المحضر
لو فيه فرق كبير أو تضارب هذا دليل لصالحك

٢- عدم وجود إذن مكتوب
اطلب من النيابة الإطلاع على إذن الضبط
لو لا يوجد إذن الضبط أو صدر بعد القبض أصبح القبض باطل

٣- شهادة الشهود
يعنى ناس كانت موجودة وقت القبض الجيران أو المارة
شهادتهم بتثبت إن لا يوجد تلبس ولا إذن نيابة

٤- الكاميرات والموبايلات
تسجيلات كاميرات المراقبة والتصوير بالموبايل
بتوضح طريقة القبض وتوقيته الحقيقى

٥- أقوالك فى التحقيق
أول ما تقف أمام النيابة العامة قول بوضوح تم القبض عليا
بدون إذن من النيابة وبدون حالة تلبس
مهم جداً تثبت هذا فى المحضر من البداية

٦- محضر التحريات
راجع تاريخ التحريات
وهل صدر الإذن بناء عليها قبل ولا بعد القبض ؟
لو الإذن بعد القبض بطلان واضح

٧- طلب إثبات الحالة
من حقك تطلب إثبات وقت ومكان القبض الحقيقى
وإثبات أى تجاوز حصل

ثالثاً : أخطاء لازم تتجنبها :-
١- السكوت وعدم ذكر إن القبض كان بدون إذن نيابة
٢- التوقيع على أقوال فيها إن القبض تم بشكل قانونى
٣- التأخر فى إثبات الواقعة

النتيجة القانونية لو ثبت إن القبض تم بدون إذن نيابة
١- يتم بطلان القبض والتفتيش
٢- سقوط أى دليل مترتب عليه
٣- ممكن توصل للبراءة

الخلاصة إثبات إن القبض تم بدون إذن نيابة
ليس مستحيل لكن محتاج تركيز من أول لحظة