المنفيون على «جزيرة حِنكِش»

في العام 2060 نُفي عدد من حاملي الصفة «مذيع» -على ما تُفرج-، إلى إحدى الجُزر في كوكب «أم ترتر»، والتقى هناك على ظهر هذه الجزيرة المُذيع «أبو نواس» مع الإعلامي «شطانوفي»، بالإضافة إلى سيئة الإعلام الأولى «ماما دولت»، ويجاورهم مُقدم البرامج الشهير «عم بهلول».
جانب الصواب متخذ هذا القرار الجريء بعد استشعار سكان الجزر المجاورة بعدم البلبلة واللزوجة والأونطة والكركبة، وذات يوم قرر المنفيون أن يتخلصوا من الملل الذي يعايشونه على «جزيرة حِنكِش» بلعب كرسي الاعتراف.

أبونواس: إيه رأيكم يا جماعة نلعب كرسي الاعتراف بدل الخنقة دي؟
عم بهلول: بلاش كلمة جماعة دي خلينا منفيين بكرامتنا.
ماما دولت: ما تقولهم يا شطانوفي نبدأ لعب.
شطانوفي: هو أنا حايشهم.. فين أيام اللعب مع دودي على الهوا.. عليه العوض.
ماما دولت: مين دودي دي كمان؟
عم بهلول: يا جماعة خلينا في اللعب أحسن بلاش أمور شخصية جانبية لولبية.
أبونواس: أنا هلف الإزازة واللي تيجي عليه يعترف.
أبونواس: اهو الدور بدأ من عندك يا عم بهلول.. هتعترف بإيه؟
عم بهلول: مش عارف ليه أنا كنت بعمل فـ نفسي كده؟.. بطلع أقول للناس كلام كبير وكتير وأضخم الأحداث وألملم أوراقي وأروح البيت بالملايين وأنا ضميري عمره ما انبني.. أيوه أنا بعترف إني ياما ضللت المشاهدين.. بس ده أكل عيشي يا جماعة.
أبونواس: لفة كمان.. الدور جه عليكِ يا ماما دولت.. هتعترفي بإيه؟
ماما دولت: أنا طول عمري بحلم بالشهرة والوصول لدواير أقرب ويبقى ليّ نفوذ.. بس بصراحة كنت بسلُخ الطرف اللي مش على هوايا وعمري ما بصيت لأرائهم على إنها حاجة مهمة.. بس أنا كنت بأدي رسالتي الإعلامية.
أبونواس: لفة كمان.. الدور جه عليّ.. هعترف بإيه بقى؟
أبونواس: مش كيميا هي أصلاً أنا حاولت استغل طلتي على الشاشة وقُربي من الناس كنت بتكلم بلغتهم ولغيت تفكيرهم ووزعت عليهم شوية شعارات مع حبة منطق مع دمعتين وشوية حلفانات والعملية كلت معاهم وعديت.. بس هما نسيوني دلوقت مش عارف ليه؟
أبونواس: كده متبقاش غير شطانوفي بيه.. هتعترف بإيه؟
شطانوفي: أنا معايا طبلة.. تيجوا نطبل شوية؟
المنفيون في صوت واحد: يووو حتى هنا انت مزهقتش!