«المرشح حنفي الأبهة»

أعلن «خيري» و«بدوي» و«رشاد» ترشحهم للانتخابات المرتقبة، ولكن «الضابط شريف» و«حنفي الأبهة» علموا بالأمر، وقررا أن يفضحوا أمرهم..
حنفي الأبهة: هنعمل اِيه يا شريف بيه في الورطة المهببة دي؟

الظابط شريف: علمي علمك يا حنفي.. بس احنا مش لازم نسكت دي مهزلة.
عبلة زوجة شريف: جرى اِيه يا شريف اِنت هتسيب بابا في الظروف دي لوحده وهتنزل تطارد -المنافسين-.
الظابط شريف: اسكتِ بقى يا عبلة.. بابا اِيه دلوقت.. كده كده هيكسب باكتساح لأنه مرشح كتلة بحالها.
موسى بيه والد عبلة: نؤ بقى يا جوز بنتي.

خيرية أم عبلة: ياى ياى.. اِيه حنفي الأبهة ده.
حنفي الأبهة: يا وليّة لمي نفسك لأجبلك نسوان الحتة يبعتروكِ انتِ وجوزك.
منى أخت شريف: وأنا هعمل اِيه يا حنفي؟
حنفي الأبهة: هبقى أقولك بعدين يا مون مون.. خلي بالك اِنتِ بس من #كورونا وأخواتها.
صابر والد حنفي: يبني اِحنا مالنا ومال خيري وبدوي ورشاد خلينا فـ حالنا و-اليُفط- بتاعتهم في حالهم.
الظابط شريف: حضرتك قريت هما كاتبين اِيه على اليُفط بتاعت الدعاية يا عم صابر.. دي جريمة مشقلبين العَلم؟
صابر والد حنفي: حاولت أكتر من مرة على الفيسبوك بس مش قادر استوعب -نكش فراخ وكتاكيت-.
أحمد أخو حنفي: أنا عاوز اشحن الباقة يابا علشان دُعا تدخل على تيك توك.

حنفي الأبهة: عاوزة تدخلي على تيك توك ليه يا دُعا.. ده بيحبس البنات دلوقت.. فيه إنَّ.
دُعا: بصراحة احنا اللي بنسوق حملة ويُفط خيري وبدوي ورشاد.. ومش هنرشحك يا أبهة.
نعمت الرقاصة: وأنا بعمل برنامج على قناة الحدث اليوم وجايبة فيه الهرم الأستاذ حلمي ومش فاضشيا.
خيري: هه هه برضه شاغلك يا أبهة.. تعالى نحُط اِيدينا فـ اِيد بعض يا حنفي وننزل على قايمة واحدة.
رشاد: وبعدين بقى يا أبهة ما تماين معانا ونوعدك نتعلم القراية والكتابة ونكتب اليفط صح.
بدوي: أنا خايف أوي من حملات السوشيال ميديا والتريقة ليل ونهار.. وممكن الأستاذ وائل الإبراشي يستلمنا.
حنفي الأبهة: أنا موافق بس بشرط يا رجالة.
خيري: أوامر يا أبهة.
حنفي الأبهة: حمو بيكا يغني غنوة الحملة: باتون ساليه للمرشح هات.