«كورونا 19 جيجا»

ذهب «باسم» إلى أقرب محل لصيانة الأجهزة الإلكترونية والكمبيوتر، بمنطقة شبرا مصر، لإصلاح المشكلة التي ظهرت فجأة بجهازه، وعندما فتح المهندس «أكرم» اللاب، اكتشف مفاجأةّ!

باسم: إيه ده يا بشمهندس؟
أكرم: مش عارف.. أنا أول مرة أشوف رسالة زي دي.

باسم: المشكلة إن اللاب مش عاوز يفتح من الصبح.
أكرم: طب انت آخر حاجة نزلتها عليه إيه؟
باسم: لأ أوعى دماغك تاخدك لبعيد ده لاب شغل مش ترفيه.
أكرم: هههه يا سيدي بتكلم جد.. يمكن يكون فيروس ولا حاجة.
باسم: هههه يمكن يكون كورونا فيروس فعلاً.. ربنا يستر.

أكرم: طيب أنا هعمل محاولة يمكن يفتح ونشوف فين المشكلة.
باسم: ياريت يا بشمهندس أنا مقدرش استغنى عنه أبدًا.
أكرم: خير إن شاء الله نعمله Scan ونغيرله نسخة ويندوز.
باسم: ع البركة.. أعدي عليك بعد قد إيه؟
أكرم: لأ خليك قاعد شوية وهتستلمه.

باسم: معقولة.. طب ممتاز.
أكرم: هلبس بس الكمامة وأعقم الجهاز وألبس الجوانتي وأولع بخور وأبدأ على طول.
باسم: ده انت لو روحت البيت تتغدا وتيجي أسهل.
أكرم: ههه معلش بقى إجراءات احترازية وكده.
باسم: صح والوقاية خير من الاشتغالات.
أكرم: بسم الله.. إيه ده يا أ. باسم؟

باسم: خير يا بشمهندس؟
أكرم: الجهاز سقط نسخة ومسح كل حاجة على الهارد.
باسم: يا خبر.. دي تبقى مصيبة بالنسبالي.
أكرم: عارف ليه؟
باسم: لأ طبعًا مش عارف.

أكرم: علشان دخلت على موقع «جهة مسئولة».. وصدقت الأرقام والإحصائيات بتاعت #كورونا ونقلتها من على نفس الجهاز والناس شيرتها من عندك.. وأصلاً كل ده مشكوك فيه.
باسم: طب وأنا ذنبي إيه في كل ده؟
أكرم: علشان أنت مواطن واعي.. وكان لازم تفضي «19 جيجا» للحصيلة اليومية لإصابات «كوفيد-19» قبل العيد.
إشعار على تليفون باسم: محصلة اليوم من فيروس كورونا المستجد (Erorr).