«رضا عبدالعال» قابل «مارادونا» في مدرجات «كوكب زُحل»

زُحَل، واسمه مشتق من الجذر «زَحَل» بمعنى تنحّى وتباعد، ويُقال إنه سمي زُحَل لبعده في السماء، أما الاسم اللاتيني فهو «ساتورن» وهو إله الزراعة والحصاد عند الرومان، ويُمثل رمزه منجل الإله الروماني سالف الذكر، أما مارادونا فهو الاسم الثالث لأسطورة الكرة الأرجنتينية دييغو أرماندو مارادونا -دي من ويكيبديا-، فيصل خورشيد تقريبًا -دي بقى من عندي-، وبحكم تباعد القارات فلم يطلع الكاتب على رقمه القومي، لأنه لا يحمل بطاقة من الأساس بحسب روايات المقربين من اللاعب الغامض بسلامته، وفي رحلة لملاعب كرة القدم خارج كوكب دوري «القط والفار»، طار الكابتن رضا عبدالعال إلى زُحَل بعيدًا عن «السحر والشعوذة» ليُشاهد مباراة استثنائية، فالتقى نجم منتخب مصر الأسبق بنجم كرة القدم الأشهر، ليدور بينهما هذا الحوار داخل مدرجات الملعب الرئيسي بكوكب زُحَل:

رضا عبدالعال: عم الناس ونجم الكورة بتاعت زمن المتعة والإمتاع عليّ النعمة انت برنس.
دييغو مارادونا: ثانكيو.
رضا عبدالعال: ثانكيوهك معاك يا قائد.
دييغو مارادونا: هو آر يو؟
رضا عبدالعال: اصدق عيب عليك اللُغة دي انت مش بتشوف إبراهيم فايق ولا إيه؟
دييغو مارادونا: فائق.. نو نو أي دونت اندرستاند يو إني واي.
رضا عبدالعال: ما تشوفلنا مترجم يا جماعة في اليوم اللي مش هيعدي ده.
مجدي عبدالغني: السلاموا عليكم.

رضا عبدالعال: أهلاً يا عم البلدوزر اقسم بالله كده كتير انت جيت هنا ازاى؟.. ده احنا في زُحَل زُحَل.
مجدي عبدالغني: عادي جدًا حجزت أول صاروخ من ناسا وركنت التذكرة كده.. بُص كده كده.
رضا عبدالعال: صبرنا يارب.. ترجملنا يا عم كلام الراجل ده عاوزين ندردش معاه شوية.
مجدي عبدالغني: هاو دو يو دو دييغو؟ آي آم مجدي ابدوالغني بلاي فوتبول إن هيستوري أوف ايجيبت وورلد كاب 90 أند “أهرزت” جول أون هولندااااا.. يو نو مي؟
رضا عبدالعال: يا عم ارحم أهلي شوية وركز في الكلمتين اللي عايزين نقولهم.
دييغو مارادونا: أنا استطيع أنا اتحدث العربية -بس كنت بجيب أخركم ههههه-.
مدحت شلبي: يا نهار أبيض ملعوبة هههههه.

رضا عبدالعال: كِن واسكت انت يا كابتن متحت دلوقت خليك مع القنوات والبوكسرات بتاعتك.
مدحت شلبي: قُل أعوذ برب الفلق.
دييغو مارادونا: ما هو أغرب موقف حدث لك يا كابتن رضا في مشوارك مع كرة القدم في بلدكم؟
رضا عبدالعال: حقيقي وبدون مجاملة لحد.. ليه مفيش غير نادي الزمالك هو اللي بينكد علينا طول الوقت.. شوفوا فايلر.
دييغو مارادونا: اممم الزمالك اسمع عنه كثيرًا أنه أهم فريق في مصر مع الأهلي.
رضا عبدالعال: ربنا يُجبر بخاطرك يا أبو الأساطير.. وانت إيه أغرب حاجة حصلتلك في مشوارك المنيل بستين نيلة ده؟
دييغو مارادونا: ذات مرة تم اختطافي من قبل جسم غامض.. بعدما تناولت قليل من المشروبات الكحولية كنت في عداد المفقودين من المنزل لمدة 3 أيام.. بعدما وصلت إلى المنزل، قلت إن أجسام غريبة فضائية اختطفتني أخذوني معهم خارج الأرض.

رضا عبدالعال: مبياكلش خيالك واسع.. طب انت قُلت لو أخدت كاس العالم في 2010 كنت هترقص عريان.. واديكوا اخدتم الصابونة وانت مقلعتش.
دييغو مارادونا: نشكر الرب.. أنه لم يحدث لأنني كنت سأظهر عاريًا والفتى ميسي كان سيستغل الموقف ويزيد من الاستخفاف بدمه هو وبيليه -اللي مش بطيقه-.
رضا عبدالعال: مالك ومال الأساطير دي يا كابتن؟
دييغو مارادونا: ليونيل لاعب عظيم لكنه لا يصلح للقيادة لكنه لا يمكنك أن تجعل من شخص يذهب للحمام 20 مرة قبل كل مباراة قائدًا هو لا يمتلك تلك الميزة.

رضا عبدالعال: وعمك بيليه؟
دييغو مارادونا: -عمك انت عشان ما اتغباش عليك- فهو يقوم بأمور غبية عندما يتناول حبوب منع الحمل الخاطئة.. وكما ذكرت من قبل يجب أن يعود إلى المتحف.
رضا عبدالعال: ده احنا عندنا تُحف عاوزة تروح المتحف من زمان وسايبينهم ياكلوا عيش في التدريب والتعليق والتحليل والمواقع والقنوات سبوبة دايرة وكده.
دييغو مارادونا: لديكم مو صلاح لاعب رائع ويبعث على الأمل وضد المخدرات.

رضا عبدالعال: تنصح الشباب اللي بيتعاطى مواد مخدرات بإيه يا بوب؟
دييغو مارادونا: الشخص الذي يتورط في الإدمان عليه أن يحارب هذا الأمر كل يوم.
مجدي عبدالغني: ها خلصتوا حواركم يا كابتن عاوز الكابتن مارادونا افرجه على حاجة.
رضا عبدالعال: خير يا كابتن.. هتفرجه على اليوتيوب بتاعي ولا وأنا براهن إبراهيم فايق ولا وأنا بدرب المحلة في الملعب وبسلخ لاعيبة الزمالك والمنتخب؟
مجدي عبدالغني: لأ جوني في كاس العالم 90.
دييغو مارادونا: شيت.